"بیلدیر" قیشدا زنگانین "موج بیداری" آدلی بیر هفته لیگی منی و نئچه دوستو چالیشماغا چاغیردی.گئتدیک.بو هفته لیک ۱۳۸۲-نجی ایلین یاریسیندان ایشه باشلامیشدی و نئچه ساییدان سونرا دایانمیشدی.اما ائله او نئچه سایی اوجا بیر سس سالدی.درگی زنگانین شیفاهی تاریخینه و توپلومسال مساله لره باش قوشوب و چوخ اوخوجو قازانمیشدی.یازیچی لاری دا زنگانین دئیه رلی قزئته چی لریندن اولموشدولار.دئمک او قزئته چی لرین ایکیسی یئنی هیات ده واریدیلار.ایکی-اوچ ساییدان آرتیق چیخاردابیلمه دیک.دورد آدام آیریلدیق.
بو ایل تورک حرکاتی چوخ چتین ایل گئچیرتمک ده دیر.یئدی آی ایلدن گئچیب و بو مدتده اونلار آدام توتولوب و زیندان یوخسا شاللاق و مادی جریمه حکملری آلیب لار.یوزلری ده چئشیتلی یوللار ایله حرکتدن دوردورولوب لار.گئدیردیک دئدیگیم هفته لیکده مساله میز اوزره یازاق.تنقید ائدیب وتنقیدلری ائشیده ک.گره ک تورک مساله سی واساسدا ایراندا میللی مساله اطرافلی بیر حالدا اورتایا قویولا و میللت بیرلیکده دوشونورلری یاردیمی ایله دوشونمه گه چالیشا.هر حالدا او هفته لیکده ایشلمه ایمکانی اولمادی.بو ایل علمی چالیشماغا وقتیم و فراغتیم اولماسا دا دئدیگیم چتینلیک لرین و تضییقات تورتمه لره قارشی یازماغا مجبور قالدیم.نئچه قیسا یازی دان سونرا وئبلاگ آچمانی دوشونوب بو صحیفه یاراندی:سوزلر.زنگانلی آدینا.(بیز زنگان تورکلری ائله بیل هر تورک شهرینین اهالیسیندن آرتیق شهریمیزین آدینی گتیرمه لی ییک.یالنیز اوستانیمیزین اوسته آذربایجان آدی اولماماق ایچین و لهجه میزده فعللرین اکینی باشقا شکیلده سویله دیگیمیز ایچین آذربایجاندا خالقین بئینینده اونلاردان فرقله نیریک.زنگانا یوللاری دوشمه ین لرین بعضی تورک اولدوغوموزو دا بیلمز لر.)
دئمک اینترنتی گزیردیم.سایتلارین و وئبلاگلارین ساییسی اینسانین گوزونو قارالدیر.دئدیم هر یئرده ایمکان اولماسا هله بو مئدیانین دوواری آلچاق دیر.الیم دوگمه لر اوسته دولاندی و بئله یازیر....... .
ام بو یازیدا دئمه لی یم یازاندا یازماغی دا دوشونه رم.بو اوزو بویوک بیر چتینلیک یارادیر.هر حالدا یازینی دوشونوب یازی اولدوغونو آنلاتماغا چالیشیرام و او حالدا دا دوشونجه نین بو یازیدا دوزگون یازیلیب یازیلماماسینی دوشونوب دوشوندورمه گه جان آتیرام.بئله بیر "عمل" یا دوغروسو"معامله" یوروجو و بعض زامان فایداسیزدیر.(یازی ایله یازیچی آراسیندا معامله!)
ایندی مدتلردن سونرا تورک چولوک دن باشقا بیر آیری سوزو یازیب یاییرام.هر زامان هر یئردن باشلانسا تورکچولگه گئدن یول ایندی اوردان باشلاییب بیرباشقا یئرده دایانیب.منه بئله گلیر تورکچولوک آدلاندیردیغیمیز ذات(شئی) بوتون دونیا و اینسان و بو ایکینین آراسیندا اولان هر ذاتجا گئنیش و بویوک دور.بونون اوچون چوخ یئرلره باش چئکمنی دوشونورم و گلیب دوشوندورمه گه چالیشیرام.
هله لیک