يازماغي اورگنديكدن آز سونرا، يازماغا باشلاميشام. بيلميرم، بلكه اورگنديكجه ده يازميشام. دوغروسو مكتبين ايلك ايللريندن بري يازيرام. او ايللرده خالام اري، مني و خالام اوغلونو بير تئاترين تاماشاسينا آپاردي. ائوه قاييدان كيمي يازماغا باشلاديم. او تاماشانين آرديني يازديم. اوشاقليق ايللريم دولودو بو يازيليب يوخسا يازيلماميش خياللار ايله. اوزلليكله هر زامان، باخديغيم فيليملر بئينمده ياشارديلار. ايكي ساعات فيلمه باخسايديم ساعاتلار اونون قالانيني ياشادارديم. يازديم دئيه م :"يازماماق يازماغدان چوخ چتينيميش." ايندي بو يازماديغيم، دوغروسو ايسته ديگيمي يازماديغيم گونلر يازابيلديگيم گونلردن چوخ چتين گئچير و بونو يازمالييديم. بلكه يازي ديلگيمي دولدورماق ايچين!
يازماق هر شئيي منه راحاتلانديرير؛ بيله اولوم كيمي، هئچ بير شئيي بليرلنمه ين گئرچگي. چوخ زامانلار اينديكي كيمي بوشونا دا، بئله يازماق اولمور. او زامان يالنيز اولوم ايشارير. اولوم اولدوغو اوچون يوخ، من اوزومو و اونمليسي دوشونه بيله جكلريمي يازماميش گله بيله جگي ايچين. بو يازي يالنيز قورخومو بيريلرينه آچماق ايچين دير يالنيز قورخدوغوم شئيدن.