ايران تورك حركاتينين 15 ياشي اولسادا 1385- نجي ايل خرداد آيينين حركاتي توركچولوگون بيرينجي كوتلوي گوستريشي ساييلابيلر. آرتيق خرداد، تورك حركاتينا و اوزلليكله آذربايجان تورپاقلاريندا باش وئرن اولايلارا، سوسيال باخيمدان بير باشلانغيج نقطه سي دير. سياسال گوجوموزن يوخلوق زاماني بو سوسيال حركته سياسال باخيش بيزيم تورك پروژه سي ايچين يازابيله جك پروگراميميزي تام دگيشديره بيلر.
ائله او زامان بعضلري خالقي خياوانلاردا دوام ائتمگه چاغيريرديلار. اما گئرچكده سونوندا بير شهر لاپ چوخو ايكي كز گوستريه چيخابيلدي. اوچونجو تظاهراتا هئچ شهرده گوج يوخودو و حوكومت ده نئجه خالقين اونونه چيخابيله جگيني ياخچيجاسينا بيليردي. سونرا دا مهر و اسفند ميتينگلرينه هئچ يئرده قورولما اجازه سي وئريلمه دي و حوكومت ييغينجاق قورولوب قورولماميش اونون پوزماسيني باجاردي.(البته او حركتلر هاميسي خرداد حركاتينن آرديندا اولدو و لازيم ايدي. مهر و اسفند، بوتون پتانسيلميزين آزاد ائتمه سينه چاليشدي و خردادي ايلين سونونا دك جانلي و ياراديجي ساخلادي.) آرتيريلمالي دير، بو مهر و اسفند ييغينجاقلاريندا خرداد و گوستريلرينين يوزده بير قاتيليمي اولمادي و چوخ دا خالقي گئنيش سويه ده ماراقلانديرمادي. توركچولر كنترل آلتيندا ترپشه بيلمه ييرلر و كوتله هله بئله بير آدلار و يوللار ايله خياوانا گلمه يير.
خرداد حركاتي 15 ايل توركچولوگون سونوجو ايدي. ايكينجي حركت يئنه ايللر چاليشما و تبليغه باغلي دير. بونون اوچون خرداد گوستريلرينين تكراري هر يئرده لازيم و اولوملو دگيل. يالنيز خالق او آنلاري اونوتمامالي دير. اونمليسي بو حركتي بئيينلرده و جانلاردا ديري ساخلاماق دير. هله بو حركتين ندنلري و اولومونون نئجه ليگي دوغرو – دوزگون آراشديريلماييب. خرداد دا توركچولوك دوشونجه سي بيرينجي يول اولاراق خالقين تظاهراتلاردا كي شعارلارينين تمل ايدي.
خرداد ايران تاريخينده، مين ايل تورك سولطانلاري حاكيم اولسالار دا بيرينجي توركچولوك گوستريسي ايدي. آراشديرمالي بو اولايدي! بو اولايين تمل گوتورولمه سي، ايستر – ايستمز خالق ايله توركچولوك دوشونجه سيني بير – بيرلرينه باغلاياجاق و "هاراي هاراي من توركم" شعاريني خالقين ابدي ميللي مانيفيست و سوزونه دونده ره جكك.
سونوندا : نه قدر بو حركت و اولاي آرتيق تانيتديريلسا او قدر ده جانلي و ديري قالاجاق. يوخسا يالنيز بير آد كيمي گئچميشده كي سوزلره اساس گوتورولمه سي اينديدن اونون اونودولماسي حوكمونده دير. آذربايجان خياوانلاري توركونكو دور؛ ايكينجي گوستري باشلانديغي زامان اونو دوام ائتديرمگه گوجوموز اولمالي دير. بير مدني حركتين بوندان باشقا يولو يوخودور.